本站首頁 > 作品集錦 > 近代詩 > 促兮城市-1
  近代詩
偓促兮城市-1
  偓促兮城市-2
  促兮城市-3
  短篇小說
 
說故事的人
 
小老鼠
  榲桲樹
 
刺青奇譚
 
打開著的窗
  失蹤
  狼群
  自傳小說:菩提樹
 
引言
 
一章   塵歸塵
  第二章  女流氓
  第三章  一枝草
 
第四章  小可大代誌
 
第五章  珍重再見
  第六章  往事只能
  第七章  喜相逢

 

 

 

偓促兮城市-1
   
 

Akzag ee Sviachi

 

作者﹕黃勁連

zokciar: Ngg Kexngleen

 

簡式現代文翻譯﹕郭勝義

kafnseg hexntai-buun huan'ek: Kueq Sernggi

 

原文有些漢字,譯者不甚了解,這些字用紅色字標示。如譯文與作者原意有所出入,敬請賜教

kueq.s@smlt.org

 

1 獻詩 Hexn Sy
2 序詩 Su Sy
3 迄暗兮燈光 Hid Axm ee Tengkngf
4 綿綿兮台灣情愛 Mimii ee Tai'uaan Zeng'aix
5 偓促兮城市 Akzag ee Sviachi
6 夜間飛行 Iaxkafn Huiheeng
7 撐渡伯也 Thetoxpeq`ar
8 雨落在岑墘 Ho Loeh ti Gimkvii
9 阮阿娘 Guarn Aniaa
10 流目屎 Laau bagsair
11 蟋蟀 Toxpeh'ar
12 八月兮心情 Peq`gueh ee Simzeeng
13 即款兮滋味 Cid Khuarn ee Zubi
14 燒酒愛改 Sioeciur Aix Kair
15 阮兮眠床 Guarn ee Binzhngg
16 阮兮庄頭 Guarn ee Zngthaau
17 沉宓 Timbiq
18 寫詩吐絲 Siafsy Thorsy
19 一隻飛行機 Cit-ciaq Huiheeng-ky
20 一隻白鴒鷥 Cit-ciaq Peqlexngsy

 

 

獻詩

Hexn Sy

 

坑崁兮流水

Khorngkhaxm ee lauzuir

 

 

日夜無停咧流動

jidia booe theeng teq liutong

 

 

伊那親像咧共阮講

y nar chinchviu teq ka guarn korng

 

 

汝愛不時來運動

lir aix putsii laai uxntong

 

 

維持汝心臟兮跳動

ichii lir simzong ee thiaurtong

 

 

序詩

Su Sy

 

即幾冬來,離開

Cid kuir tafng laai, lixkhuy

 

 

故鄉,走天涯

korhiofng, kviaa thengaai

 

 

為着較好兮將來

ui tioeh khaq hoer ee cionglaai

 

 

滿腹兮辛酸匟心內

muafpag ee sinsngf khngx simlai

 

 

阮不時來想起

Guarn putsii laai sviu khir

 

 

故鄉兮心愛;流浪

korhiofng ee sim'aix, liulong

 

 

兮日子,阮上數念兮

ee jidcir, guarn siong siaurliam ee

 

 

是阿娘煮兮菜

si aniaa zur ee zhaix

 

 

阮不時想起,故鄉

Guarn putsii sviu khir, korhiofng

 

 

對阮無限兮慈愛

tuix guarn boehan ee zu'aix

 

 

親像渡鳥,今日

chinchviu toxciaur, kinjit

 

 

往東,明日往西

ofngtafng, bengjit ofngsay

 

 

故鄉兮形影,定定

korhiofng ee hengviar, tviaxtvia

 

 

佇阮兮夢中走來

ti guarn ee baxngtiofng kviaa laai

 

 

阮知影阮虧欠兮

Guarn zaiviar guarn khuikhiaxm ee

 

 

是對故鄉兮愛

si tuix korhiofng ee aix

 

 

有一工阮無法度

u cit-kafng guarn booe huatto

 

 

忍耐:異鄉兮鳥隻

jymnai : ixhiofng ee ciawciaq

 

 

兮吼叫、花落花開

ee khofngkioex, huef loeh huef khuy

 

 

阮會收拾行李

guarn e siusip henglir

 

 

揮別青紅燈下兮

huipet chvi'aang-tefng ha ee

 

 

無奈佮街路邊兮

boenai kab kelo pvy ee

 

 

悲哀,坐着

pi'ay, ze tioeh

 

 

半暝兮遊覽車轉來

pvuarmii ee iularm-chiaf tngr`laai

 

 

 

轉來阮思念兮

Tngr`laai guarn suliam ee

 

 

故鄉、鹽分地帶

korhiofng, Iamhwn textaix

 

 

含土地徛鬥陣

ham thofte khia taurtin

 

 

參水牛烏秋徛規排

zham zuyguu ochiw khia kuy paai

 

 

 

白鴒鷥行來行去兮

Peqlexngsy kviaa laai kviaa khix ee

 

 

塩埕佮船隻來去兮

iamtviaa kab zunciaq laikhix ee

 

 

大海,是阮寫詩兮

tuaxhair, si guarn siar sy ee

 

 

題材,阮無跤步手路

tezaai, guarn booe khapo chiwlo

 

 

嘛無甚麼詼諧,阮干礁

ma booe sviafmih chioerkhuef, guarn kantvaf

 

 

卜拍拚來寫

bueq phahpviax laai siar

 

 

寫作穡儂兮目屎

siar zoerzhaan-laang ee bagsair

 

 

佮討海儂兮無奈

kab thoefhair-laang ee boenai

 

 

寫鹽分兮詩、阮

siar Iamhwn ee sy, guarn

 

 

則有較好兮將來

ciaq u khaq hoer ee ciofnglaai

 

 

迄暗兮燈光

Hid Axm ee Tengkngf

 

迄暗兮燈光

Hid axm ee tengkngf

 

 

青青 照着雨滴

chvichvy     cioex tioeh hoxliap

 

 

佇出產文旦兮城市

ti zhutsarn buntaxn ee sviachi

 

 

阮看阿扁也

guarn khvuax a'Pvir`ar

 

 

去互儂用夭壽步創去

khix ho laang iong iawsiu-po zhoxng`khix

 

 

東南派輸西北派

tanglam-phaix sw saipag-phaix

 

 

公平 正義

kongpeeng       zernggi

 

 

互儂店塗跤踏來

ho laang tiaxm thokhaf tah laai

 

 

踏去 阿扁也講

tah khix       a'Pvir`ar korng

 

 

干礁輸兩票 買票佮作票

kantvaf sw nng-phioex:  befphioex kab zoerphioex

 

 

阮兮目屎一滴一滴

guarn ee bagsair cit-tiq cit-tiq

 

 

阮兮胸坎痛疼

guarn ee hengkharm tharngthviax

 

 

舉頭 我看逐家面青青

giaqthaau       guar khvuax tagkef bin chvichvy

 

 

西庄兮燈火嘛

sezngf ee tenghuer ma

 

 

青青 台灣也

chvichvy     Tai'uaan`ar

 

 

一片烏暗無元氣

cit-phvix o'axm booe guankhix

 

 

 

 

 

 

仝款兮暗暝

Kaxngkhuarn ee armmii

 

 

生冷兮天氣

chvilerng ee thvikhix

 

 

佇吳三連先生兮

Ti Gvoo Samleen Sensvy ee

 

 

故鄉、學甲廟前

korhiofng, Hagkaq-bioe zeeng

 

 

台灣儂兮面佫恰烏青

Tai'uaan-laang ee bin koeq khaq ochvy

 

 

目珠金金看李宗藩博士

bagciw kimkym khvuax Lir Cionghuafn Phoksu

 

 

猶原去互儂創去

iuguaan ho laang zhoxng`khix

 

 

猶原東南派

iuguaan tanglaam-paix

 

 

輸西北派

sw saipag-phaix

 

 

互創去兮滋味

ho zhoxng`khix ee zubi

 

 

是甚麼滋味

si sviafmih zubi

 

 

無情兮烏手

boezeeng ee ochiur

 

 

將民主兮種籽

ciofng binzur ee zefngcir

 

 

抦抦死

tvextve`sir

 

 

三百冬兮歷史

svapaq-tafng ee legsur

 

 

台灣儂輸在儂

Tai'uaan-laang sw ti laang

 

 

搓圓抦扁

soevii-tvexpvir

 

 

佇學甲廟邊

ti Hagkaq-bior pvy

 

 

我有聽見將軍溪水

guar u thviaf kvix Ciofngkwn khezuir

 

 

咧哭 無限兮傷悲

teq khaux        boehan ee siongpy

 

 

舉頭 台灣兮上空

giah thaau     Tai'uaan ee sioxngkhofng

 

 

一片兮烏暗無元氣

cit-phvix ee oaxm booe guankhix

 

 

一粒流星閃晣

cit-liap liuchvy siafmsiq

 

 

 

 

 

 

流對迄爿去

Laau tuix hid peeng khix

 

 

綿綿兮台灣情愛

Mimii ee Tai'uaan Zeng'aix

 

──賀葉俊麟老先生七十大壽

---------hoe Iap Zurnliin lau sensvy chitzap tuaxsiu

 

 

落雨兮暗暝

Loeqho ee armmii

 

 

異鄉兮港邊

ixhiofng ee kafngpvy

 

 

阮時常唱汝兮歌詩

guarn sisioong chviux y ee kuasy

 

 

汝兮歌汝兮詩

y ee kuaf y ee sy

 

 

解消阮滿腹兮稀微

kaysiaw guarn muafpag ee hibii

 

 

 

 

 

 

阮兮細漢時

Guarn ee serhaxn sii

 

 

小小兮年紀

sioefsior ee nikir

 

 

雖然唔捌汝

suijeen mxbad lir

 

 

但是月光閃晣兮暗暝

taxnsi gueqkngf siafmsiq ee armmii

 

 

若唱汝兮「淡水暮色」

na chviux lir ee “Taxmzuir bogseg”

 

 

若唱汝兮「舊情綿綿」

Na chviux lir ee “kuxzeeng mimii”

 

 

會感覺趣味

e kafmkag zhurbi

 

 

感覺人生兮歡喜

kafmkag jinsefng ee hvuahir

 

 

 

 

 

 

阮漸漸大漢

Guarn ciaxmciam tuaxhaxn

 

 

出外心悶兮時

zhutgua sym bun ee sii

 

 

看着異鄉兮船隻

khvuax tioeh ixhiofng ee zunciaq

 

 

來來去去 阮也是唱

lailaai-khirkhix     guarn ia si chviux

 

 

汝兮歌詩 「放浪人生」

lir ee kuasy       “hornglong jinsefng”

 

 

「再會夜都市」

“zairhue ia-tochi”

 

 

汝兮歌汝兮詩

Lir ee kuaf lir ee sy

 

 

陪伴阮流浪兮日子

Puephua guarn liulong ee jidcir

 

 

 

 

 

 

如今阮已經大漢

Jukyn guarn ykefng tuaxhaxn

 

 

阮已經捌代誌

guarn ykefng bad taixcix

 

 

若唱着「悲情兮城市」

na chviux tioeh “pizeeng ee sviachi”

 

 

猶原不覺珠淚滴

iuguaan putkag zului tiq

 

阮知影汝寫規千首兮歌詩

guarn zaiviar lir siar kuir zhefng siur ee kuasy

 

 

攏是優美兮台語詩

lorng si iubir ee Taigir sy

 

 

無輸日本兮西條八十

boesw Jidpurn ee Saijio Yaso

 

 

阮知影即層代誌

guarn zaiviar cid zaan taixcix

 

 

伊代表兮意義

y taixpiaur ee irgi

 

 

親像春蠶吐絲

chinchviu zhunzhaan thorsy

 

 

一絲一絲一絲一絲

cidsy-cidsy   cidsy-cidsy

 

 

阮卜追隨汝兮跤步

guarn bueq tuisuii lir ee khapo

 

 

寫台灣味兮台語歌詩

siar Tai'uaan bi ee Tai'uaan kuasy

 

 

寫出台灣儂兮悲情

siar Tai'uaan-laang ee pizeeng

 

 

寫出台灣儂兮哀悲

siar Tai'uaan-laang ee aipy

 

 

 

偓促兮城市

Akzag ee Sviachi

 

佇城市 阮親像

Ti sviachi    guarn chinchviu

 

 

一粒兮果籽 離葉

cit-liap kuefcir     lixhioeh

 

 

離枝 吹風暴日

lixky   zhuehofng phagjit

 

 

漸漸會失去伊兮

ciaxmciam e sitkhix y ee

 

 

色緻 漸漸袂受得

sektix       ciaxmciam e siu tioeh

 

 

陰濕兮天氣 漸漸

imsib ee thvikhix ciaxmciam

 

 

伊會來爛 爛

y e laai nvua        nvua

 

 

爛 爛 爛去

nvua  nvua  nvua`khix

 

 

 

 

 

 

佇城市 我

Ti sviachi    guar

 

 

無法度來忍受

booe huatto laai jymsiu

 

 

日黃昏兮街路邊

jit honghwn ee kelo pyvy

 

 

青紅燈兮閃晣

chvi'aang-tefng ee siafmsiq

 

 

我無法度忍受

guar booe huatto jymsiu

 

 

心肝底兮稀微

simkvuaf ter ee hibii

 

 

我無法度 來

guar booe huatto laai

 

 

忍受迄款流浪兮日子

jymsiu cid khuarn liulong ee jidcir

 

 

 

 

 

 

時常三更半暝

Sisioong svakvy pvuarmii

 

 

行來行去看天星

kviaa laai kviaa khix khvuax thvichvy

 

 

倒佇眠床攬白色兮被單

toer ti binzhngg larm peh-seg ee phuextvuaf

 

 

翻來又佫翻去

huafn laai iu koeq huafn khix

 

 

 

 

 

 

所以 我決心

Sofir  guar kuatsym

 

 

卜來離開即個

bueq laai lixkhuy cit'ee

 

 

偓促兮城市

akzag ee sviachi

 

 

 

 

 

 

即個出門愛紮

Cit'ee zhutmngg aix zaq

 

 

鎖匙兮街市

soefsii ee kechi

 

 

即個出門愛舉

cit'ee zhutmngg aix giah

 

 

雨傘兮街市

hoxsvuax ee kechi

 

 

即個 唔知

cit'ee       mxzay

 

 

卜去佗食

bueq khix thoefciah

 

 

三頓兮街市

svaf-tngx ee kechi

 

 

 

 

 

 

即個隨時卜起厝稅

Cit'ee suisii bueq khir zhursuex

 

 

即個人情較薄紙

cit'ee jinzeeng khaq poeh zuar

 

 

咱愛隨時準備

larn aix suisii zwnpi

 

 

來搬厝兮街市

laai pvuazhux ee kechi

 

 

即個塗跤不時澹澹

cit'ee thokhaf putsii tamtaam

 

 

即個冷淡兮

cit'ee lefngtam ee

 

 

路燈照着淒冷

loxtefng cioex tioeh zhelerng

 

 

兮街路兮街市

ee kelo ee kechi

 

 

 

 

 

 

行夠佗 道是

Kviaa kaux tue        toe si

 

 

咧拍麻雀兮街市

teq phaq machiog ee kechi

 

 

咧爽六合彩兮街市

teq sngr lioghabzhair ee kechi

 

 

薰酒粉味滿滿是

hunciur hwnbi muafmuar si

 

 

檳榔汁滿滿是

pinnngg-ciab muafmuar si

 

 

烏煙毒氣滿滿是

o'efn togkhix muafmuar si

 

 

 

 

 

 

我決心卜來

Guar kuatsym bueq laai

 

 

離開 離開即個

lixkhuy        lixkhuy cit'ee

 

 

互我神經衰弱兮街市

ho guar sinkefng suijiok ee kechi

 

 

即個偓促兮都市

cit'ee akzag ee tochi

 

 

 

 

 

 

轉去南部兮鄉里

Tngr`khix lampo ee hionglir

 

 

參生我養我兮

zhafm svy guar iorng guar ee

 

 

土地徛鬥陣

thofte khia taurtin

 

 

啉一喙故鄉

lym cit-zhuix korhiofng

 

 

大圳兮溪水

tuaxzuxn ee khezuir

 

 

解消我滿腹兮

kaysiaw guar muafpag ee

 

 

鬱卒 佮憤氣

utzud          kab hurnkhix

 

 

夜間飛行

Iaxkafn Huiheeng

 

暗暝來時 佇

Armii laai ee sii,   ti

 

 

二樓頂暗淡兮房間

ji laau terng armtaxm ee pangkefng

 

 

阮時常點一葩燈

guarn sisioong tiarm cit-phaf tefng

 

 

台灣海峽起風湧

Tai'uaan haykiab khir hong'erng

 

波浪一重一重

phoelong cit-teeng cit-teeng

 

 

 

 

 

 

因為阮對土地兮

In'ui guarn tuix thofte ee

 

 

感情 有誠濟兮

kafmzeeng     u cviaa ze

 

 

代誌互阮跋摒

taixcix ho guarn chiapuaqperng

 

 

互阮不平

ho guarn putpeeng

 

 

不管是幸福

putkuarn si hexnghog

 

 

抑是艱苦兮一生

iafsi kankhor ee itsefng

 

 

阮卜飛向茫茫兮前程

guran bueq puef hioxng bangbaang ee zengtheeng

 

 

 

 

 

 

佇台灣兮天頂

Ti Tai'uaan ee thviterng

 

 

一片冷冷 但是

cit-phvix lefnglerng      taxnsi

 

 

阮猶原點一葩燈

guarn iuguaan cit-phaf tefng

 

 

雖然孤單一個

suijeen kotvuaf cidee

 

 

阮猶原開始

Guarn iuguaan khaisir

 

 

阮兮艱苦旅程

guarn ee kankhor lwtheeng

 

 

開始阮兮夜間飛行

khaisir guarn ee iaxkafn huiheeng

 

 

飛過暗摸兮夜色

puef kuex armbofng ee iaxseg

 

 

飛過孤星閃晣兮天頂

puef kuex kochvy siafmsiq ee thviterng

 

 

撐渡伯也

Thetoxpeq`ar

 

即世、即世儂

Citsex, citsirlaang

 

 

故鄉、是可愛兮鐘聲

korhiofng, si khoefaix ee zengsviaf

 

 

一句、一句,是白鴒鷥

cit-kux, cit-kux, si peqlexngsy

 

 

規排,飛過來

kuy paai, puef kuex laai

 

 

 

 

 

 

是阿母兮叮嚀

si abur ee tengleeng

 

 

非常兮慈愛

huisioong ee zu'aix

 

 

一聲一聲,對南方

cit-sviaf cit-sviaf , tuix lamhofng

 

 

飛過來、飛過來

puef kuex laai, puef kuex khix

 

 

 

 

 

 

在搖動兮船車

Ti ioetong ee zunchiaf

 

 

在阮流浪兮生涯

ti guarn liulong ee senggaai

 

 

在阮兮征衣佮酒痕

ti guarn ee zeng'y kab ciwhuun

 

 

編織兮眠夢

pengcid ee binbang

 

 

一聲、一聲

cit-sviaf, cit-sviaf

 

 

一聲長一聲短

cit-sviaf tngg cit-sviaf ter

 

 

即生,短短

cid sefng, tefter

 

 

抑長長兮一生

ia tngtngg ee itsefng

 

 

故鄉也佮我無緣

korhiofng ia kab guar boe' een

 

 

 

 

 

即款兮痛疼、故鄉

cid khuarn ee thviarthaxn, korhiofng

 

 

兮大圳、故鄉兮溪水

ee tuaxzuxn, korhiofng ee khezuir

 

 

故鄉兮田園、故鄉兮

korhiofng ee zhanhngg, korhiofng ee

 

 

竹抱、故鄉兮迆堆

tekphoe, korhiofng ee zhatuy

 

 

故鄉兮黃家祖厝

korhiofng ee Ngg-kaf zofzhux

 

 

祖厝前兮檨仔樹

zofzhux zeeng ee svuai'ar-chiu

 

 

參我無關參我無緣

zham guar boekuafn zham guar boe'een

 

 

 

 

 

 

親像撐渡伯也共款

Chinchviu thetopeq`ar ia kaxngkhuarn

 

 

阮在溪兮兩爿

guarn ti khef ee nng-peeng

 

 

撐來撐去──佇

thee-laai thee-khix-------ti

 

 

台北城佮故鄉

Taipag sviaa kab korhiofng

 

 

之間兮河流

cikafn ee hoeliuu

 

 

撐來 撐去

thee-laai     thee-khix

 

 

 

 

 

 

時常台北迄爿

Sisioong Taipag hid peeng

 

 

伸來招魂兮手

zhwn laai cioehuun ee chiur

 

 

台北鬧熱兮暗暝

Taipag nauxjet ee armmii

 

 

青燈紅燈咧叫我

chvitefng angtefng teq kioex guar

 

 

 

 

 

 

同時黃昏兮時

Tongsii hoxnghwn ee sii

 

 

南方咧叫我

lamhngf teq kioe guar

 

 

故鄉兮甘蔗花

korhiofng ee kamciax-huef

 

 

白色兮甘蔗花

peh-seg ee kamciax-huef

 

 

甘蔗花頂懸兮

kamciax-huef tefngkuaan ee

 

 

烏秋咧叫我

ochiw teq kioex guar

 

 

我可憐可愛兮

guar khoefleen khoefaix ee

 

 

童年咧叫我

tongnii teq kioex guar

 

 

阮老母徛店

guar lauxbur khia tiaxm

 

 

埕尾咧叫我

tviabuer teq kioe guar

 

 

 

 

 

 

所以阮真正是

Sofir guarn cincviax si

 

 

悲哀兮──撐渡伯

pi'ay ee -------thetopeq`ar

 

 

佇台北暗淡兮燈火

ti Taipag armtaxm ee tenghuer

 

 

佮故鄉閃晣兮燈光

kab korhiofng siafmsiq ee tenghuer

 

 

撐來 撐去

thee laai       thee khix

 

 

撐來 撐去

thee laai       thee khix

 

 

雨落在岑墘

Ho Loeh ti Gimkvii

 

雨綿綿 落在

Ho mimii     loeh ti

 

 

岑墘 落雨兮暗暝

gimkvii        loeqho ee armmii

 

 

阮阿爸孤一人

guarn apaf kof cit-laang

 

 

捾着簡單兮行李

kvua tioeh kafntafn ee henglir

 

 

踏着淒迷兮夜色

tah tioeq zhebee ee iaxseg

 

 

行出鄉里 阮看

kviaa zhud hionglir        gurn khvuax

 

 

伊穿一領台灣衫

y zheng cit-niar Tai'uaan svaf

 

 

跤穿that-bit

khaf tah thatbit

 

 

卜出外求利 阮迄時

bueq zhutgua kiuli,    guarn hid sii

 

 

雖然小小兮年紀

suijeen sioefsioer ee nikir

 

 

嘛知影哀愁兮滋味

ma zaiviar aichiuu ee zubi

 

 

目珠金金看 看

bagciw kimkym khvuax,   khvuax

 

 

伊寂寞兮形影

y citbok ee hengviar

 

 

行過竹抱跤柴堆邊

kviaa kuex tekphoe'ar khaf zhatuy pvy

 

 

漸漸來消失

cixamciam laai siausiq

 

 

佇落雨兮暗暝

ti loeqho ee armmii

 

 

阮兮目屎偷偷來輾落去

guarn ee bagsair thauthaw laai lixn`loqkhix

 

 

 

 

 

 

仝款兮落雨天

kaxngkhuarn ee loeqho thvy

 

 

雨落在岑墘

ho loeh ti gimkvii

 

 

雨落在窗邊

Ho loeh ti thafng pvy

 

 

聽着雨聲心肝鬱悶

thviaf tioeh hoxsviaf simkvuaf utbun

 

 

阮困袂去 困袂去

guarn khuxn be khix        khuxn be khix

 

 

想阿爸孤一人

sviu apaf kof cit-laang

 

 

佇他鄉外里

ti thvahiofng guaxlir

 

 

食鹹酸苦澀兮滋味

ciah kiamsngf khofsiab ee zubi

 

 

伊佇高雄碼頭

y ti Koehioong befthaau giaa huex

 

 

穿一領薄薄兮台灣衫

zheng cit-niar poeqpoeh ee Tai'uaan svaf

 

 

跤穿that-bit

khaf tah thatbit

 

 

港都兮落雨暝

kafngtof ee loeqho mii

 

 

雨水點點滴

hoxzuir tiafmtiarm tiq

 

 

 

 

 

 

相仝兮雨天

sioekaang ee hoxthvy

 

 

雨落在阮厝兮窗邊

ho loeh tiq guarn zhux ee thafng pvy

 

 

雨落在阮厝兮岑墘

ho loeh tiq guarn zhux ee gimkvii

 

 

阮阿爸對高雄轉來

guarn apaf tuix Koehioong tngr`laai

 

 

帶足濟足濟好食物

tuax ciog ze ciog ze hoer sibbut

 

 

阮當然足歡喜

guarn tong'jeen ciog hvuahir

 

 

但是想起阿爸

taxnsi sviu khir apaf

 

 

出外兮日子

zhutgua ee jidcir

 

 

食赫爾濟兮苦味

ciah hiah`niq ze ee khofbi

 

 

 

 

 

 

阮總是想起

guarn zofngsi sviu khir

 

 

阿爸穿一領台灣衫

apaf zheng cit-niar Tai'uaan svaf

 

 

跤穿that-bit

khaf zheng thatbit

 

 

佇落雨兮暗暝

ti loeqho ee armmii

 

 

阮阿娘

Guarn Aniaa

 

阮阿娘,伊講

Guarn aniaa, y korng

 

 

伊是天生業命

y si thengsefng giabmia

 

 

透早着出門

thaurzar tioeh zhutmngg

 

 

無閒甲日頭落山

boe'eeng kaq jidthaau loeqsvuaf

 

 

伊無閒行田岸

y boe'eeng kviaa zhanhvua

 

 

伊無閒咧削蔗根剝蔗籜

y boe'eeng teq siaq ciarkyn peq ciarhah

 

 

伊無閒咧搓草、壅肥

y boe'een teq soezhaur, akpuii

 

 

無閒佇埕尾疊稻草、絪柴

boe'eeng ti tviabuer thiap tiuxzhaur, khurn zhaa

 

 

日頭赫爾大

jidthaau hiah`niq tua

 

 

伊無閒甲大粒汗細粒汗

y boe'eeng kaq tua liap kvua sex liap kvua

 

 

 

 

 

 

阮阿娘,伊講

Guarn aniaa, y korng

 

 

伊是勞碌命

y si loelogmia

 

 

伊無閒咧照顧

y boe'eeng teq ciaurkox

 

 

厝內、厝外

zhurlai, zhurgua

 

 

古廟前,大樹跤

kor bior zeeng, tua chiu khaf

 

 

伊無閒咧洗衫、曝被單

y boe'eeng teq ser svaf, phak phuextvuaf

 

 

伊亦着 伊兮金孫

y ia tioeh zhua y ee kimswn

 

 

行公厝埕,行田岸

kviaa kongzhux tviaa, kviaa zhanhvua

 

 

看咱兮稻仔一日一日大

khvuax larn ee tiux'ar cit-jit cit-jit tua

 

 

咱兮蕃藷一日一日澶

larn ee hancii cit-jit cit-jit thvuax

 

 

 

 

 

 

阮時常佇三更夜半

Guarn sisioong ti svakvy-iaxpvuax

 

 

想起阿娘中年來守寡

sviu khir aniaa tiong'nii laai siwkuar

 

 

伊受兮艱苦,受兮風寒

y siu ee kankhor, siu ee honghaan

 

 

伊兮孤單,伊兮憂悶

y ee kotvuaf, y ee iubun

 

 

阮兮心情袂快活

guarn ee simzeeng be khuairuah

 

 

阮兮心也,那親像

guarn ee sym ia, nar chinchviu

 

 

親像腊條火

chinchviu lagtiaau-huer

 

 

燒燙家己兮心肝

sioethngx kati ee simkvuaf

 

 

 

 

 

 

想起阮兮貧憚

Sviu khir guarn ee pintvua

 

 

阮總是困甲迹晏

guarn zofngsi khuxn kaq ciah`vuax

 

 

想起阮阿娘一工

sviu khir guarn aniaa cit-kafng

 

 

透早無閒駕日頭落山

thaurzar boe'eeng kaq jidthaau loesvuaf

 

 

阮兮心會疼

guarn ee sym e thviax

 

 

阮兮心像刀割

guarn ee sym chviu toef kuaq

 

 

流目屎

Laau bagsair

 

酒若啉夠

Ciur na lym kaux

 

 

會流目屎

e laau bagsair

 

 

 

 

 

 

流目屎兮代誌

Laau bagsair ee taixcix

 

 

我驚互儂笑

guar kviaf ho laang chioex

 

 

 

 

 

 

所以,阮若啉

Sofir, guarn na lym

 

 

夠磅;驚別儂

kaurpong; kviaf padlaang

 

 

行入來看着

kviaa jiblaai khvuax`tioeh

 

 

阮兮目箍紅

guarn ee bagkhof aang

 

 

阮道 

guarn toe       tvirchvy

 

 

去棺一罐目藥水

khix kvua cit-kuaxn bagioek-zuir

 

 

 

 

 

 

共儂講阮目珠疼

Ka laang korng guarn bagciw thviax

 

 

愛點一屑仔目葯水

aix tiarm cidsut'ar bag'ioeh-zhir

 

 

 

 

 

 

所以,阮若

Sofir, guarn na

 

 

點目藥水兮時

tiarm bag'ioeh-zuir ee sii

 

 

阮兮目屎會輾落來

guarn ee bagsair e lixn`loeqlaai

 

 

蟋蟀

Toxpeh'ar

 

咱兮天公伯也恬恬

Larn ee thvikongpeq`ar tiaxmtiam

 

 

咱兮土地無話無句

larn ee thofte booe ue booe kux

 

 

 

 

 

 

咱兮大海嘛恬恬

larn ee tua hair ma tiaxmtiam

 

 

抱着船隻抱着島嶼

phoe tioeh zunciaq phoe tioeh toefsu

 

 

 

 

 

 

大海恬摺摺

Tua hair tiaxm zuhzuq

 

 

映照着天光雲影

viarcioex tioh thenkofng hunviar

 

 

 

 

 

 

所以,白露後

Sofir, peqlo au

 

 

阮宓沉阮厝內

guarn bihtiim guarn zhurlai

 

 

看天光雲影

kvuax thengkngf hunzhair

 

 

阮無愛佫講話

guarn booe aix koeq kofng'ue

 

 

 

 

 

 

日頭赤炎炎、阮

Jidthaau chiahiaxmiam, guarn

 

 

無愛大粒汗細粒汗

booe aix tvua liap kua sex liap kvua

 

 

田岸行來行去

zhanhvua kviaa laai kviaa khix

 

 

 

 

 

 

阮用牛喙襤

Guarn eng guzhuirlafm

 

 

掩阮兮喙

afm guarn ee zhuix

 

 

宓沉阮兮厝內

bihtiim guarn ee zhurlai

 

 

阮無愛佫大喙開開

guarn booe aix koeq tua chuix khuikhy

 

 

參四界兮蟲聲

zham sirkex ee thangsviaf

 

 

參四跤仔爭論

zham sirkha'ar zenglun

 

 

拔頷管筋握舌根

giur axmkurn-kyn tioeh cykyn

 

 

 

 

 

 

白露後,阮宓沉

Peqlo au, guarn bihtiim

 

 

阮厝內,恬恬聽

guarn zhurlai, tiaxmtiam thviaf

 

 

恬恬來聽四跤仔

tiaxmtiam laai thviaf sirkha'ar

 

 

佇四邊拍鑼挵鼓

ti sirpvy phaq looe loxng kor

 

 

八月兮心情

Peq`gueh ee Simzeeng

 

每一年八月

Muir cit-nii peq`gueh

 

 

火燒埔兮天氣

huefsioepof ee thvikhix

 

 

海口透鹹鹹兮風

haykhaur thaux kiamkiaam ee hofng

 

 

日頭赤炎炎

Jidthaau chiaq iaxmiam

 

 

燒疼大地兮身軀

Sioethviax tuaxte ee sinkhw

 

 

燒疼咱兮肌膚

Sioethviax larn ee kihw

 

 

 

 

 

 

每一年八月

Muir cit-nii peq`gueh

 

 

港口兮鑼聲若響

haykhaur ee loesviaf na hiarng

 

 

阮兮心、阮兮心

guarn ee sym, guarn ee sym

 

 

開始艱苦、阮兮胸坎

khaisir kankhor, guarn ee hengkharm

 

 

阮兮骨頭開始酸疼

Guarn ee kutthaau khaisir sngthviax

 

 

 

 

 

 

阮是「如見大賓」兮心情

guarn si “juu-kexn-taixpyn” ee simzeeng

 

 

阮是袂使清清採採兮

guarn bexsair chirnchirnzhayzhair`ee

 

 

 

 

 

 

因為咱有恬恬來

In'ui larn u tiaxmtiam laai

 

 

向塩分兮土地

hioxng Iamhwn ee thofte

 

 

向曠闊兮大海

hioxng khorngkhuaq ee tuxhair

 

下過願;阮一定

he kuex guan; larn itteng

 

 

卜繼承鄉土兮香火

bueq kerseeng hiongthor ee hviuhuer

 

 

卜追隨前輩兮跤迹

bueq tuisuii zengpuex ee khachiaq

 

 

卜店咱兮土地

bueq tiaxm larn ee thofte

 

 

行出咱兮跤步

kviaa zhud larn ee khapo

 

 

 

 

 

 

怎樣兮艱苦

zvuafviu ee kankhor

 

 

一定卜拚卜衝

itteng bueq pviax bueq chiofng

 

 

卜店咱兮土地

bueq tiaxm larn ee thofte

 

 

拍兮鑼

phaq ee looe

 

 

擂咱兮鼓

thuii larn ee kor

 

 

將塩分兮旗升懸

ciofng Iamhwn ee kii sengkuaan

 

 

將文學兮旗升懸

ciofng bunhak ee kii sengkuaan

 

 

 

 

 

 

所以,咱是袂使清採兮

Sofir, larn si bexsae chirnzhair`ee

 

 

所以,阮愛參儂辯論

sofir, guarn aix zhafm laang pexnlun

 

 

所以,阮愛大喙開開

sofir, guarn aix tuaxzhuix khuikhuy

 

 

參儂諍甲心狂火熱

zhafm laang zvy kaq simkoong-huefjet

 

 

所以,阮愛得罪誠濟儂

sofir, guarn aix titzue cviaa ze laang

 

 

所以,阮愛接受一陣

sofir, guarn aix ciapsiu cidzun

 

 

佫一陣兮酸痛,佮

koeq cidzun ee sngthviax, kab

 

 

八月真正艱苦兮心情

Peq`gueh cincviax kankhor ee simzeeng

 

 

 

 

 

 

阮愛啉淡薄仔酒

Guarn aix lym taxmpooear ciur

 

 

來麻醉阮兮神經

laai bazuix guarn ee sinkefng

 

 

來麻醉有一點點

laai bazuix u cidtiafmtiarm

 

 

迄款屈原兮心情

hid khuarn Khiokguaan ee simzeeng

 

 

我知影、知影

guar zaiviar, zaiviar

 

 

即世儂,阮行向

citsirlaang, guarn kviaa hioxng

 

 

塩兮旅途  註定是

Iaam ee lwtoo         zurtvia si

 

 

海鳥兮旅途

hayciaur ee lwtoo

 

 

 

 

 

 

八月兮港口

Peq`gueh ee kafngkhaur

 

 

若透鹼鹼兮風

Na thaux kiamkiaam ee hofng

 

 

鑼聲若響,阮兮

loesviaf na hiarng

 

 

心肝着艱苦

simkvuaf tioh kankhor

 

 

即款兮滋味

Cid Khuarn ee Zubi

 

即款兮滋味

Cid khuarn ee zubi

 

 

是甚麼滋味

si sviafmih zubi

 

 

 

 

 

 

早起時,雄雄

Zafkhir sii, hionghioong

 

 

無張持佇鏡裡

booe tviutii ti kviax`nih

 

 

看着鬢邊兮白毛

khvuax tioeh pirnpvy ee peqmof

 

 

親像迄號菅芒花

chinchviu hid hoe kvuabaang-huef

 

 

一枝二枝

cit-ky nng-ky

 

 

 

 

 

 

阮兮神經麻去

Garn ee sinkefng ba`khix

 

 

秋風一直吹

chiuhofng ittid zhuef

 

 

吹軟弱兮花枝

zhuef nngfjiok ee hueky

 

 

日子一工一工過

jidcir cit-kafng cit-kafng kuex

 

 

一工一工過去

cit-kafng cit-kafng kuex

 

 

熟似兮朋友

segsai ee peng'iur

 

 

一工一工老去

cit-kafng cit-kafng lau`khix

 

 

 

 

 

 

青春一工一工老去

Zhengzhwn cit-kafng cit-kafng lau`khix

 

 

唔免偌久,阮嘛愛

mxbern jua kur, guarn ma aix

 

 

去塗州聽蟋蟀

khix thociw thviaf toxpeh'ar

 

 

離開親情、朋友

lixkhuy chinzeeng, peng'iur

 

 

離開父母、兄弟

lixkhuy peqboer, hviati

 

 

 

 

 

 

阮兮鬢邊開始

guarn pirnpvy khaisir

 

 

落霜、即款滋味

loeqsngf, cid khuarn zubi

 

 

唔知是甚麼滋味

mxzay si sviafmih zubi

 

 

燒酒愛改

Sioeciur Aix Kair

 

文章會使拚命

Buncviw exsair pviarmia

 

 

燒酒袂使 干礁

sioeciur bexsair  kantvaf

 

 

會使一兩杯

exsair cit-nng puef

 

 

嘛袂使天天來

ma bexsair thenthefn laai

 

 

 

 

 

 

阮後生定定講

Guarn hauxsvy tiaxtvia korng

 

 

爸也兮燒酒愛改

paq'ar ee sioeciur aix kair

 

 

無 真正是害

booe          cincviax si hai

 

 

阮某嘛定定講

guarn bor ma tviaxtvia korng

 

 

啉酒 唔是

lym ciur      mxsi bair

 

 

但是 過度過量

taxnsi        kuerto kuerliong

 

 

身體會拍歹

sinther e phahphvair

 

 

 

 

 

 

有影 放膽文章

Uxviar      parngtvar bunciofng

 

 

是文人兮氣概

si bunjiin ee khirkhaix

 

 

唔拘 拚命啉酒

mxkur        pviarmia lym ciur

 

 

詩人兮生涯受阻礙

sijiin ee senggaai siu zofgai

 

 

鐵拍兮身軀 嘛會

thiqphaq ee sinkhw         ma e

 

 

損害 互醫生看

sngfhai       ho isefng khvuax

 

食藥仔上蓋害

ciah ioeg'ar siong kaix hai

 

 

 

 

 

 

若不時啉 啉甲

Na putsii lym       lym kaq

 

 

風雲變色 一個人

honghuun perngseg     cidee laang

 

 

那大箍呆 昂昂戇戇

nar tua goxngtay gonggoong-goxnggong

 

 

唔知東 抑西

mxzay tafng       ia say

 

 

有蓋害 有蓋害

u kaix hai       u kaix hai

 

 

踅電火柱 踅

zoong texnhuefthiau     zoong

 

 

踅十外擺 也哀也

zoong zap gua pvair     ia ay ia hvay

 

 

互厝邊頭尾仔笑

ho zngpvy-thaubuefar chioex

 

 

笑甲大嘴離西西

chioex kaq tuaxzhuix lii saisay

 

 

 

 

 

 

唔通做燒酒仙

mxthafng zoex sioeciur-sefn

 

 

愛做秀才 阮兮

aix zoex siurzaai  guarn ee

 

 

親情朋友共阮講

chincviaa peng'iur ka guar korng

 

有影 有影都着

uxviar       uxviar toetioeh

 

 

愛做秀才 唔通

aix zoex siurzaai    mxthafng

 

 

阿西做燒酒兮奴才

asef zoex sioeciur ee lozaai

 

 

從今以後一定改

chiongkyn y'au itteng kair

 

 

至少 袂使天天來

Circioer      bexsair thenthefn laai

 

 

一禮拜 啉一屆

cit-lefpaix     lym cit-pvair

 

 

澀一寡仔 袂使

sip cidkuar     bexsair

 

 

一杯一杯來 啉駕

cit-puef cit-puef laai     lym kaq

 

 

規身軀搖搖 擺擺

kuy sinkhw ioeiooe      paypair

 

 

這是阮衷心兮期待

zef si guarn ciongsym ee kithai

 

 

阮兮眠床

Guarn ee Binzhngg

 

阮兮眠床

Guarn ee binzhngg

 

 

恩情較大

unzeeng khaq tua

 

 

細漢兮時

serhaxn ee sii

 

 

阮老母抱我困

guarn lauxboer phoe guar khuxn

 

 

一暝大一寸

cit-mii tua cit-zhuxn

 

 

老母掗我

lauxboer var guar

 

 

佇祖先留落來

ti zofsefn laau`loeqlaai

 

 

兮眠床 不管

ee binzhngg    putkuarn

 

 

寒抑是熱 阮

haan iafsi jet    guarn

 

 

一日一日大

cit-jit cit-jit tua

 

 

 

 

 

 

阮漸漸大漢

Guarn ciaxmciam tuaxhaxn

 

 

佇眠床頂撦

ti binzhngg terng chiaf

 

 

佇眠床頭摒

ti binzhngg terng perng

 

 

佇遐撦跋摒

ti hiaf chiapuaqperng

 

 

 

 

 

 

眠床是阮兮

binzhngg si guarn ee

 

 

是阮兮運動埕

si guarn ee uxntoxngtviaa

 

 

 

 

 

 

天氣有時寒

Thvikhix u sii kvuaa

 

 

有時熱 阮

u sii jet      guarn

 

 

一日一日大

cit-jit cit-jit tua

 

 

佇眠床困

ti binzhngg khuxn

 

 

參小弟困足倚

zhafm sioefti khuxn ciog uah

 

 

逐家漸漸大

tagkef ciaxmciam tua

 

 

小弟小妹

sioefti sioefmue

 

 

參阮作伴

zhafm guarn zoex phvua

 

 

行過kham1-kham1 khiat8-khiat8

kviaa kuex khamkhafm-khiagkhiat

 

 

流真濟兮汗

laau cyn ze ee kvua

 

 

眠床參阮逐家

binzhngg zhafm guarn tagkef

 

 

那親像針恰線

nar chinchviu ciafm kab svuax

 

 

永遠袂分散

Efng'uarn be hunsvuax

 

 

 

 

 

 

流真濟汗

Laau cyn ze kvua

 

 

亦不時喙礁

ia putsii zhuirtaf

 

 

如今我已經

jukyn guar ykefng

 

 

食足濟兮風飛砂

ciah ciog ze ee hongpuesuaf

 

 

對外口倒轉來

tuy gua toertngr`laai

 

 

風飛砂拌拌咧

hongpuesuaf pvuaxpvua leq

 

 

我想人生兮道理

guar sviu jinsefng ee toexlir

 

 

我想眠床參咱作伴

guar sviu binzhngg zhafm larn zoex phvua

 

 

 

 

 

 

對眠床來

Tuy binzhngg laai

 

 

對眠床轉去

tuix binzhngg tngr`khix

 

 

眠床照顧

binzhngg ciaurkox

 

 

咱兮暗暝

larn ee armmii

 

 

咱兮早起

larn ee zafkhir

 

 

 

 

 

 

對眠床來

Tuy binzhngg laai

 

 

對眠床去

tuix binzhngg khix

 

 

即款兮道厘

cid khuarn ee toelir

 

 

唔免怨嘆甚麼

mxbern uarnthaxn sviafmih

 

 

 

 

 

 

有一工咱會

U cit-kafng larn e

 

 

對眠床轉去

tuix binzhngg tngr`khix

 

 

阮兮庄頭

Guarn ee Zngthaau

 

阮兮庄頭 有兩葩火

Guarn ee zngthaau       u nng-phaf huer

 

 

上蓋暗則化

siong kaix axm ciaq huaf

 

 

 

一葩是鎮長兮厝

Cit-phaf si tirntviur ee zhux

 

 

一葩是阮兜

cit-phaf si guarn taw

 

 

 

 

 

 

愛拚則會贏 所以

Aix pviax ciaq e viaa        sofir

 

 

鎮長伯也 不時

tirntviwpeq`ar        putsii

 

 

拚駕三更半暝

pviax kaq svakvy pvuarmii

 

 

則開車轉來 伊兮

ciaq khuichiaf tngr`laai     y ee

 

 

車駛過阮兜 伊兮

chiaf khuy kuex guarn taw       y ee

 

 

車燈照着暗時仔

chiatefng cioex tioeh armsii'ar

 

 

有一寡冷落兮車路

u cidkuar lefngloeh ee chialo

 

 

 

 

 

 

阮若無聽着雞仔

Guarn na booe thviaf tioeh ke'ar

 

 

啼 唔願去困

thii       mxguan khix khuxn

 

 

阮時常讀冊

guarn sisioong thagzheq

 

 

讀暗淡兮天色

thak armtaxm ee thviseg

 

我有聽着蟲聲吱吱叫

guar u thviaf tioeh thangsviaf kiky kioex

 

 

我時常有看着 天頂

guar sisioong u khvuax tioeh      thviterng

 

 

兮流星 流對迄爿去

ee liuchvy      liuu tuix hid peeng khix

 

 

 

 

 

 

拚命讀台語兮冊

Pviarmia thak Taigir ee zheq

 

 

讀規暝 讀甲

thak kuy mii         thak kaq

 

 

天頂兮星攏跋落去

thviterng ee chvy lorng puah`loeqkhix

 

 

我則越頭 看

guar ciaq uadthaau       khvuax

 

 

闌珊兮燈火

lansafn ee tenghuer

 

 

照着淒冷兮夜色

cioex tioeh zhelerng ee iaxseg

 

 

 

 

 

 

阮則甘願 去眠床

guarn ciaq kamguan        khix binzhngg

 

 

攬阮兮棉績被

larm guarn ee miciorqphue

 

 

 

 

 

 

迄時陣 天色

Hid sizun      thviseg

 

 

漸漸光 雞仔

ciaxmciam kngf     ke'ar

 

 

大聲咧啼 雞鳴

tua sviaf teq thii    kef beeng

 

 

一聲天下白

cit-sviaf thenha peh

 

 

沉宓

Timbiq

 

像一尾仔魚仔

Chviu cit-buefar hi'ar

 

 

宓沉水內

timbiq zuylai

 

 

 

 

 

 

汝若卜成器具

Lir na bueq seeng khirku

 

 

汝若卜親像儂

lir na bueq chinchviu laang

 

 

汝愛學閃辟

lir aix oeh siafmphiq

 

 

汝愛學隱遁

lir aix oeh wntun

 

 

塗遁 甚至尿遁

Thotun        simcir gioextun

 

 

對一切無必要兮

tuix itzhex booe pit'iaux ee

 

 

酒肉應酬 無必要兮

ciwbaq erngsiuu  booe pit'iaux ee

 

 

乾杯 無必要兮

kanpuef        booe pit'iaux ee

 

 

頷管筋

giur axmkwnkyn

 

 

大喙開開兮爭論

tuaxzhuix khuikhuy ee zenglun

 

 

 

 

 

 

汝愛逃閃 對

Lir aix toesiarm      tuix

 

 

暗淡兮青燈紅燈

armtaxm ee chvy-tefng aang-tefng

 

 

汝愛沉宓 對

lir aix timbiq      tuix

 

 

一切無聊兮酒杯

itzhex boeliaau ee ciwpuef

 

 

對一切無聊無營養

tuix itzhex boeliaau booe engiorng

 

 

大聲細聲兮喊喝

tuaxsviaf sersviaf ee hiafmhuaq

 

 

 

 

 

 

汝愛恬恬

Lir aix tiaxmtiam

 

 

走揣汝家己

kviazhue lir kati

 

 

走轉來厝裡

kviazuarn laai zhux`nih

 

 

將家己隱藏

ciofng kati wnzhaxng

 

 

佇恁兮厝頂尾

ti lirn ee zhurtefngbuer

 

 

店汝少年歕簫兮

tiaxm lir siaurleen punsiaw ee

 

 

樓仔頂 恬恬

lau'afterng        tiaxmtiam

 

 

點一葩燈火 恬恬

tiarm cit-phaf tenghuer         tiaxmtiam

 

來寫汝兮台語詩

laai siar lir ee Taigir sy

 

 

寫詩吐絲

Siafsy Thorsy

 

寫詩 吐絲

Siafsy         thorsy

 

 

唔是為名為利

mxsi ui miaa ui li

 

 

唔是卜做台灣第一

mxsi bueq zoex Tai'uaan te id

 

只要店故鄉

cy'iaux tiaxm korhiofng

 

 

唔免棺流浪兮行李

mxbern kuarn liulong ee henglir

 

 

唔免食鹼酸苦味

mxbern ciah kiamsngf khofbi

 

店故鄉 阮某

tiaxm korhiofng         guarn bor

 

 

佇我兮身邊 阮囝

ti guar ee sinpvy        guarn kviar

 

 

佇我兮身驅邊

ti guar ee sinkhw pvy

 

 

阮着有勇氣

guarn tioeh u iofngkhix

 

 

阮着會

guarn tioeh e thuhpviax

 

三更半暝 嘛會

svakvy pvuarmii       ma e

 

 

吐絲 三更半夜

thorsy         svakvy pvuaria

 

 

天星閃晣 露水

thvychvy siafmsiq      loxzuir

 

 

澹濕外口兮天氣

tamsib guaxkhaur ee thvikhix

 

我恬恬店樓仔頂

guar tiaxmtiam ti lau'ar terng

 

 

點燈火寫詩

tiarm tenghuer siafsy

 

 

 

 

 

 

像春蠶吐絲 是

chviu zhunzhaan thorsy     si

 

 

嘔心瀝血兮代誌

ofsym-leghed ee taixcix

 

 

阮若會當店潭仔墘

guarn na extaxng tiaxm Tham'afkvii

 

 

聽故鄉兮蟲聲鳥啼

thviaf korhiofng ee thangsviaf niawthii

 

享受草地兮塗味

hiafngsiu zhawte ee thobi

 

 

食阿娘煮兮菜

ciah aniaa zur ee zhaix

 

上蓋有滋味

siong kaix u zubi

 

 

阮着有法度

guarn tioeh u huatto

 

 

像春蠶吐絲

chviu zhunzhaan thorsy

 

 

拚命來寫詩

pviarmia laai siafsy

 

 

 

 

 

 

卜等春花開

bueq tarn zhunhuef khuy

 

 

卜等雉雞啼

bueq tarn thixkef thii

 

 

是可能兮代誌

si khoefleeng ee taixcix

 

 

只要互我店潭仔墘

cy'iaux ho guar tiaxm Tham'afkvii

 

 

一世儂唔免離開

cidsirlaang mxbern lixkhuy

 

 

 

 

 

 

時常三更半暝

sisioong svakvy-puarmii

 

 

一個儂行來行去

cidee laang kviaa laai kviaa khix

 

 

親像一枝蠟條燒家己

chinchviu cit-ky laqtiaau sioef kati

 

 

行來行去行來行去

kviaa laai kviaa khix kviaa laai kviaa khix

 

 

我想,我想

guar sviu guar sviu

 

 

一定春花會開

yteng zhunhuef e khuy

 

 

一定有開花

yteng u khuihuef

 

 

結籽兮日子

ketcir ee jidcir

 

 

一隻飛行機

Cit-ciaq Huiheeng-ky

 

唔是一隻鳥仔

Mxsi cit-ciaq ciawar

 

 

是一隻飛行機

Si cit-ciaq huiheeng-ky

 

 

 

 

 

 

佇電視堙A我

Ti texnsi`nih, guar

 

 

看着一隻飛行機

khvuax tioeh cit-ciaq huiheeng-ky

 

 

栽 落 去

zay`loeqkhix

 

 

 

 

 

 

栽 落 去

zay`loeqkhix

 

 

 

 

 

 

阮兮心肝 嘛

Guarn ee simkvuaf      ma

 

 

 

 

 

 

倒 頭 栽

Toerthauzay

 

 

 

 

 

 

暗時七點半

Armsii chid-tiarm pvuax

 

 

我感覺那親像

guar kafmkag nar chinchviu

 

 

一粒炸彈揕

cit-liap zartaan tixm

 

 

落阮兮田庄

loeq guarn zhanzngf

 

 

阮兮心肝

guarn ee simkvuaf

 

阮平靜兮生活

guarn pengzeng ee seng'uah

 

 

佇電視

Ti texnsi`nih

 

 

一隻飛行機

cit-ciaq huiheeng-ky

 

 

栽 落 去

zay`loeqkhix

 

 

佫挵着兩隻

koeq loxng tioeh nng-ciaq

 

 

飛行機

huiheeng-ky

 

 

真正是夭壽骨

cincviax si iawsiuxkud

 

 

 

 

 

 

阮兮心肝

Guarn ee simkvuaf

 

 

倒 頭 栽

toerthauzay

 

 

 

 

 

 

對店仔

Tuy tiafm'ar

 

 

行來公厝埕

kviaa laai kongzhux tviaa

 

 

對公厝行來松仔跤

tuix kongzhux kviaa laai zheng'ar khaf

 

 

行來松仔邊兮虎爺廟仔

kviaa laai zheng'ar pvy ee hofiabioe'ar

 

 

沿鐵枝路 行 行

een thihky-lo        kviaa kviaa

 

 

行 來 行 去

kviaa-laai    kviaa-khix

 

 

講一隻飛行機

yn korng cit-ciaq huiheeng-ky

 

 

那親像一隻鳥仔

nar chinchviu cit-ciaq ciaw'ar

 

 

無甚麼 無甚麼

booe sviafmih      booe sviafmih

 

 

 

 

 

 

* 佫講,無甚物

y koeq korng, booe sviafmih

 

 

飛行機唔是咱兮

huiheeng-ky mxsi larn ee

 

 

奚是 大陸兮代誌

hef si yn taixliok ee taixcix

 

 

但是 內底

taxnsi         laixter

 

 

有足濟足濟

u ciog ze ciog ze

 

 

誠濟 誠濟兮

cviaa ze      cviaa ze ee

 

 

台 灣 儂啊

Tai'uaan laang aq

 

 

 

 

 

 

* 感覺無甚物

Yn kafmkag booe sviafmih

 

 

亦唔是咱家己

ia mxsi larn kati

 

 

* 照常拍麻雀

yn ciaursioong phaq machiog

 

 

照常看電視

ciaursioong khvuax texnsi

 

 

 

 

 

 

這是平常兮代誌

Zef si pengsioong ee taixcix

 

 

阮 行來行去

Guarn        kviaa laai kviaa khix

 

 

想誠濟代誌

sviu cviaa ze taixcix

 

 

行 來 行 去

kviaa laai kviaa khix

 

 

 

 

 

 

遐兮台灣儂

Hiah'ee Tai'uaan laang

 

 

盍赫爾衰

khaq hiah`niq suef

 

 

* 嘛有父母囝兒

yn ma u peqboer kviafgii

 

 

嘛有親情朋友

yn ma u chincviaa peng'iur

 

 

 

 

 

 

佇飛行機 栽 落

Ti huiheeng-ky      zay      loeq

 

 

去 迄陣 迄兮

khix   hid zun     hit'ee

 

 

時陣遐可憐兮

sizun hiah khoeleen`ee

 

 

台灣儂 佇大陸落落去

Tai'uaan-laang       ti taixliok laklag`khix

 

 

兮心肝唔知想甚麼

yn ee simkvuaf mxzay sviu sviafmih

 

 

唔知卜按怎去面對死亡

yn mxzay bueq afnzvuar khix bixntuix syboong

 

 

按怎轉去 轉去塗州

afnzvuar tngrkhix        tngrkhix tociw

 

 

 

 

 

 

唉 阮行來行去

ay      guarn kviaa laai kviaa khix

 

 

行 來 行 去

kviaa   laai   kviaa   khix

 

 

一隻白鴒鷥

Cit-ciaq Peqlexngsy

 

有一隻白鴒鷥

U cit-ciaq peqlexngsy

 

 

天暗 亦無想

thvy`axm    ia booe sviu

 

 

卜轉去

bueq tngr`khix

 

 

 

 

 

 

伊 行田岸

Y       kviaa zhanhvua

 

 

行 水圳邊

kviaa zuyzuxn pvy

 

 

行來將軍溪

kviaa laai Ciongkwn khef

 

 

行來海墘

kviaa laai haykvi

 

 

 

 

 

 

溪仔邊括摺摺

Khear pvy tiam zuhzuq

 

 

一片兮臭氣

cit-phvix ee zhaurkhix

 

 

酒矸仔、紙杯

ciwkan'ar, zuafpuef

 

 

流來流去

laau laai laau khix

 

 

看無竹排仔

khvuax booe tekpai'ar

 

 

一隻二隻搖來

cit-ciaq nng-ciaq iooe laai

 

 

搖去

iooe khix

 

 

 

 

 

 

想去溪水鳥脞脞

sviu khir khezuir osoesooe

 

 

溪仔漸漸無元氣

khe'ar ciaxmciam booeguankhix

 

 

船燈暗淡 討海儂

zuntefng armtaxm         thoefhair-laang

 

 

兮心情稀微

ee simzeeng hibii

 

 

迄隻白鴒鷥

cid ciaq peqlexngsy

 

 

目箍紅紅 佇海墘

bagkhof ang'aang        ti haykvii

 

 

行來行去

kviaa-laai kviaa-khix

 

 

 

 

 

 

伊無法度佫唱

y booe huatto koeq chviux

 

 

快樂兮港都

khuairlok ee kafngtof

 

 

唱再會夜都市

chviux zairhue iaxtochi

 

 

 

 

 

 

伊行來行去

Y kviaa laai kviaa khix

 

 

目屎澹目

bagsair taam bagkvii

 

 
     
   

 

本頁首次上網: 2006 年 4 月 30 日 /  網頁更新: 2006 年9 月 30 日

     
Copyright © 2006. All Rights Reserved.  Simplified Modern Literal Taiwanese.  SMLT.org